Eg hospiterer for tida i den sentrale forvaltinga i hovudstaden og kan etter berre to veker på eit vis stadfeste mange sin fordommar om at Oslo suger. Eller syg som det heiter på nynorsk. Hovudstaden har ei imponerande tiltrekningskraft på folk, bedrifter og kapital frå heile landet! Eg møter enkelte som bruker halvannan time til jobb kvar veg, kvar dag, og som gjer det frivillig. Dyktige folk som kunne ha fått seg arbeid med mindre pendleavstand, men som likevel brukar 3 -4 timar av døgnet på veg til og frå arbeid. Eg undrast kvifor?

”Det er liksom her i byen det skjer”. Den store arbeidsmarknaden, jobbvariasjon, karrieremuligheiter, spennande oppgåver, kort sagt å vere i og ein del av det store sentrum.

Dette er gode svar og samtidig illustrerer det utfordringa i vår evige debatt om folketalsutviklinga i fjordfylket.

Sist veke var eg på Fylkesmannen sin stand på Framtidsfylket si karrieremesse i Oslo. Her presenterte 37 bedrifter og organisasjonar seg for 180 unge som har eller kan tenkje seg ei tilknyting til Sogn og Fjordane. Dette er både langsiktig profilering av kva jobbmuligheiter som finst i fylket, og kortsiktig rekruttering for dei som er på jakt etter folk akkurat no. Aller best fungerer det på stand når dette kan kombinerast.

Eg møtte mange unge med interesse for det som skjer i (heim)fylket, nokre på klar jakt etter jobb, andre for å sondere terrenget til ”kanskje seinare”, nokre studentar som lurte på kva fagkombinasjonar som er etterspurd her vest, og nokre heilt framande og nysgjerrige som knapt nok kjenner til fylket. Det som overraska mange, meg sjølv inkludert, er den variasjonen og til dels tyngda som finst i arbeidsmarknaden i fylket vårt. Eit av våre reklamebanner har tittelen ”Landbruk – meir enn berre Dagros”. Byt ut Landbruk med Sogn og Fjordane. Her var mellom anna teknologiske bedrifter, bank og finans, reiseliv, media, grunderar, forsking, trainee-program, og sjølvsagt offentleg tenester og forvalting.

Karrieremessa illustrerte at Framtidsfylket er noko meir enn eit slagord og ein logo. Så kanskje kan vi oppleve at også Sogn og Fjordane syg og lokkar, om ikkje anna enn ved hjelp av ein sval austavind av folk med heimlengt og/eller ønske om nye utfordringar.

Twitter Facebook

I fleire av organisasjonane eg har arbeidd har vi snakka mykje om at vi må ”gå frå ord til handling”. Mange organisasjonar har store flotte dokument med tankar og vyer for korleis vi som tilsette skal vere og kva som skal skje i organisasjonen, men så er det ikkje alltid slik at vi klarar å leve opp til det vi har sagt at vi skal gjere. Det er lett å skyve ansvaret og seie at ”nei, dette har ikkje eg noko med, gå til leiaren min – ho har ansvaret”. For å klare å gå frå ord til handling må alle, både leiarar og medarbeidarar, vere villige til lære og gjere endringar i handlingsmønsteret sitt.

Ei endring eg vil fokusere på i 2010, er leiarskap og medarbeidarskap. Som leiar er eg medarbeidar med nokre ekstra roller.  Eg har stor tru på at dersom vi alle –  både medarbeidarar og leiarar – i fellesskap er ansvarlege for resultata, ja, så vil vi også prestere betre. Vi vil og vekse dersom vi i endå større grad bestemmer oss for å lære av kvarandre og deler endå meir av den kompetansen kvar og ein av oss har. Det andre eg vil gjere noko med, er å leie dei eg jobbar saman med til sjølv å finne løysingar på problemstillingar. Det gjev stor meistringsfølelse og mykje motivasjon å ta tak i utfordringar når vi ikkje kan skyve på ansvaret. Kva har du sett deg som mål i 2010?

Twitter Facebook

Sogn og Fjordane har hatt mange friske lokaliseringsdebattar. Men heldigvis finst det også gode døme på at vi klarerer å samarbeide, og det jamvel på tvers av fogderigrenser.

Så vidt eg kjenner til, har ingen andre fylke klart å stable på beina eit tilsvarande IKT-samarbeid som spleiselaget IT-forum. Dette samarbeidet, som neste år feirar 15-årsjubileum, femner om ei rad offentlege og private verksemder. Det fylkesdekkande samarbeidet gjennom IT-forum har bidrege til at fylket har teke del i ei rekkje nasjonale og internasjonale prosjekt, og har gitt oss naudsynt infrastruktur. Sidan 2003 har samarbeidet utløyst nær 150 mill. kr til breibandutbygging, og vi har no 97,5% breibanddekking.

For tida har vi fire fylkesdekkande prosjekt som demonstrerer at Sogn og Fjordane framleis er IKT-fylket. I KS-prosjektet Miside-løftet, er målet å heve kvaliteten på alle kommuneportalane i fylket, og leggje til rette for meir sjølvbetjening på nett for publikum. www.forde.kommune.no er eit godt døme på vellukka omlafting av heimesider. I 2011 skal dei kommunale heimesidene i Sogn og Fjordane liggje godt over landsgjennomsnittet på kvalitetsmålingane til Direktoratet for forvaltning og IKT.

Alle kommunane, fylkeskommunen, høgskulen, Fylkesmannen og Vestlandsforsking har delteke i Digitalt skulesamarbeid i Sogn og Fjordane. Skulane har fått på plass digitale læringsplattformar, og høve til å kommunisere og dele kunnskapar mellom skular og skuleslag. Prosjektet har kursa lærarar i å nytte IKT i undervisninga og i sosiale medium, som er ein del av elevane sin kvardag.

Prosjektet Fylkesdekkande IT-tenester for helse i Sogn og Fjordane handlar om å få til ein meir effektiv informasjonsflyt i helsevesenet. I staden for papir i posten, arbeider prosjektet med å få på plass ei sikker, elektronisk meldingsutveksling mellom Helse Førde, legekontor og omsorgstenesta.  Dei fleste legekontora i fylket skal vere klare til å sende og motta meldingar før nyttår. I same gate ligg eDokument-prosjektet, der Fylkesmannen, fylkeskommunen og kommunane samarbeider om løysingar for å kunne sende dokument elektronisk på ein sikker måte.

Alle desse prosjekta er krevjande. Mange deltakarar skal koordinerast, dei tekniske løysingane skal fungere, persontryggleiken skal ivaretakast, og folk må jobbe på nye måtar. Samarbeidsprosjekta har gitt oss erfaringar og kunnskapar i å gjennomføre komplekse prosjekt som mange andre fylke bør vere interesserte i å ta del i. 

Ja, det har jamvel ført til at vi har fått eit statleg direktorat der 70-80 tilsette har dette fylket som utgangspunkt for nasjonal IKT-utvikling.

Twitter Facebook

Vi har mange og spennande arbeidsplassar i fylket.  Framtidsfylket har samla det i 9 ulike næringsklynger. Ei av desse kallar dei offentlege tenester, forsking og utvikling. Dei lokaliserer den til Leikanger/Sogndal. Medan Leikanger har mange av dei offentlege tenestene, er  utdannings- og forskingsmiljøet saman på Campus Fosshaugane i Sogndal med mange kunnskaps- og kompetansebaserte stillingar. Høgskulen i Sogn og Fjordane og Vestlandsforsking jobbar med forskings- og utviklingsprosjekt som er forankra både internasjonalt, nasjonalt og regionalt.

Les resten av dette innlegget »

Twitter Facebook

Mange sperra opp augo då Heidi Grande Røys kunngjorde at ho går attende til styrarjobb i barnehagen etter fire år som fornyingsminister. Det naturlege hadde liksom vore ein godt betalt jobb i næringslivet, eller ein toppjobb i det offentlege. Kva som blir valet på litt sikt, skal ikkje eg spå om her. Men eg synest debatten rundt dette valet har vore interessant, fordi den tek opp spørsmålet om yrkesval, verdiar og status.

Les resten av dette innlegget »

Twitter Facebook

Forskarar hevdar at andre fylke har noko å lære av oss når det gjeld arbeidet med entreprenørskap i skulen. Kva er det som gjer at vi oppnår slike gode resultat?

Ein ny forskingsrapport slår fast at entreprenørskapsarbeidet i fylket har positiv effekt på elevane sitt skulearbeid, deira ynske om å busetje seg på heimplassen, deira ynske om å ta høgare utdanning, deira ynske om å etablere bedrift – og etablere bedrifta i Sogn og Fjordane. 

Les resten av dette innlegget »

Twitter Facebook

Vi er fleire kvinner enn menn i embetet. Våre 61 kvinner er ressurssterke og representerer både  breidde og spisskompetanse. I debattar blir det stundom etterlyst kor ein finn arbeidsplassar for dei med høgare utdanning i fylket.

Vi har kvinner med doktorgrad, juristar, embetseksamen innan natur- og samfunnsvitenskap, sivilagronomar, mastergradar i økonomi og naturvitenskap, fysiopterapeut, sjukepleiar, jordmor, sosionomar, handel- og kontorfag, høgskulekandidatar, datahøgskule, vidaregåande, førskulelærarar, jordskiftekandidatar og ei rad med master i ulike fag.

Kort sagt: Vi har ei allsidig og spennande gruppe kvinner som i høg grad er både skrive- og taleføre. Vi kjenner oss ikkje att i sytet om at det ikkje er kompetansearbeidsplassar for kvinner. Den kommande veka vil vi kvar dag leggje ut ein blogg frå kvinner i ulike avdelingar for å synleggjere ein kompetanse som blir etterlyst.

Og om det skulle vere tvil: Vi har svært tilfredsstillande tilgang på søkjarar

Twitter Facebook

Ei undersøking før stortingsvalet tok opp kva saker som tel mest når vi skal velje parti. Øvst på lista kom skulen, tett følgd av miljø og eldreomsorg.

Det er kanskje ikkje underleg at skule og opplæring er eit viktig område for folk flest. Det handlar om korleis vi tar vare på ungane våre og gir dei vilkår for fagleg, personleg og sosial utvikling i eit fellesskap som skal inkludere alle. Vi ønskjer å fostre opp nye generasjon som kan ta del i arbeids- og samfunnslivet, eit arbeids- og samfunnsliv som skal berast oppe av demokratiske grunnverdiar og omsorg og respekt for kvarandre.

Det er lett å forstå at foreldre, besteforeldre og andre vaksne er opptekne av at barn og unge skal få så gode vilkår som mogleg slik at dei kan meistre liva sine. Men engasjerer dei folkevalde seg nok, eller overlet dei i for stor grad skule og opplæring til lærarane og skuleleiarane?

Les resten av dette innlegget »

Twitter Facebook